Depang Vs Latiang

Jadi...Ada Nene satu ni..., de pulang jualan

Waktu itu de pu jualan tra laku-laku

Jadi de kasi tinggal sampai tengah malam

Pas taksi sisa satu satu baru nene ko menyimpan

lalu naik taksi pulang ke rumah

Dalam perjalanan pulang, nene ko pikiran

Kenapa sampai jualan hari ini orang tra beli habis

Sepanjang jalan itu nene ko pikiran lama ....

Pas  masuk di nene dong pu kompleks rumah begini

Mas sopir tanya,  ada yang mau turun ka

Nene tra dengar, karena masih pikir de pu jualan... 

Terpaksa mass sopir de balap lewat dari nene de pu rumah

sekitar 1 meter lewat, lalu nene ko sadar

Lalu nene batariak keras-keras “mas sopir depang mas.... sopir depang mas ....”

Setelah itu nene de bayar, sambil tunggu uang kembalian

Mas sopir de bilang sama nenek begini

“Nene bukan depang, tapi yang benar depan....tidak tambah g dibelakang”

Sudah nene de ambil kembalian

Lalu de latihan sambil pulang ke rumah “depan...depan....depan....”

Besok harinya nene tunggu taksi yang sama

Nene mau tunjukan kalau de sudah belajar

Jualan tra laku semua, nene su naik taksi yang sama

Paling depan nene ko duduk

Setelah tiba di nene dong pu kompleks

Nene de turun baru nene de bilang

“Mas sopir depan ada eee....” dengan nada pelan

Sopir su senyum-senyum simpul sambil bilang “mantap nene!”

Begitu, baru nene setelah ambil uang kembalian baru

Nene ko batariak ke mas sopr “iyo to ...kan suda latiang.....”