== TANTO ==

Oleh; Ibiroma Wamla

Sa pu tanta ni, de paling cantik suda. Dulu waktu de masih nona-nona tuuu, sunggu! Trada yang blok dia, bodi silet, baruuu de pu senyum saja, salju di Nemangkawi bisa meleleh.

Om de cerita begitu, sampe de tagaet jatu hati di tanta dia. Tapi memang sampe skarang tanta pu cantik tu masih kelihatan, garis waktu belum bisa hapus de pu cantik. Tanta Tanto de paling baik eee, tong biasa main ke de pu rumah, de tra pernah mara, atau tutup pintu selain malam. Tong bisa bermain dengan bebas eeee.

Foto; Harian Suluh Papua

Tong tinggal di kampung, jarak dari kota cuma satu jam stenga sampe dua jam su tiba, deng motor ka, mobil ka sama saja. Bebas hambatan, kecuali kalo ada hujan deras. Banjir bisa bikin sampe air naik tutup jalan dan jembatan.

Di kampung, rumah masih berjarak, kebun luas dan udara sejuk, kalau angin selalu bawa, udara segar dari gunung dewa bermata satu. Sampe skarang, gunung itu masih menyimpan misteri selain kekayaan dibahwa tanahnya. Dulu tete dong cerita di puncaknya ada kampung kampung besar dari klen dan keret di sekitar tanah Tabi. Pada satu waktu dong semua baku pisah turun ke lambah, dan kampung itu menjadi sepi, trada yang tau de pu tempat yang pasti.

Satu hari, sa dengar tanta Tanto dong ada baku bisik dengan tanta yang lainnya, "Sebentar ko pasang ekor berapa?"

"Sa pasang ekor 56, kepala 12"

"Kalo sa tadi malam mimpi lihat belut di kali, jadi sa pasang ekor 53"

Dong rame skali, sejak hari itu, sa lihat tanta de slalu pegang buku deng bolpen. Sa pernah tanya tanta dia, "Tanta, buku deng bolpen tu untuk apa? Tanta mo skola lagi ka?"

"Anak kecil stop batanya, ini tanta pu buku rumus!"

"Oooo, tanta mo kerja rumus apa ka?"

"Aiii, ko stop tanya, tanya suda, tanta su bilang itu ntuk bikin rumus tooo!"

"Ooo iyo suda tanta!" sa lari pigi gabung main deng anana lagi.

"Ayoo tong main benteng," ajak Foreme.

Linus de angkat tangan "Ahh, stop.. stop.., tong pigi petik giawas dulu baru main benteng"

"Paling giawas kacuping-kacuping, trada yang beteng-beteng!"

"Wooooii, kam stop baribut suda, tanta ada kerja rumus ni" tanta Tanto de batariak bokar bikin tong kaget stenga mati eeee, dan langsung smua trada suara.

Foreme langsung taru de pu telunjuk di depan bibir, baru de pu tangan yang satu kasi kode tong menjauh dari samping tanta pu rumah. Setelah agak jauh, kami berspakat untuk pigi panjat giawas, stelah itu baru kembali main benteng. Tapi Giawas akhirnya bikin tong lupa main benteng.

Beberapa hari kemudian, mulai dari tanta Tanto de batariak itu, de mulai beda. Kalo tong datang main de suru tong main jauh, jang dekat de pu ruma. De tutup pintu, jendela.

Sa tanya tanta dia, "Tanta knapa skarang, tanta tu suka mara-mara ka? Baru tutup pintu jendela smua, tanta takut torang atau?"

"Yooo, tanta takut kam datang ribut, bikin konsentrasi tahambur saja!"

"Adooo, tanta ada bikin apa jadi?"

"Kou ini pura-pura tratau kaaa, sengaja tanya? Ko su liat tanta tiap hari ada pegang buku deng bolpen baru kou tanya lagi. Suda kam pigi main jauh sana! Kalo tanta su selesai bikin rumus baru kam datang main dekat sini lagi"

Sa langsung kabur.

Pas tong ada duduk di bawah pohon kedondong  Foreme, tanpa banyak omong de bilang "Anana, kam tau tanta de pu rumus tu de pu nama togel. Jadi tong panggil dia Tanto alias Tanta Togel, tapi kam jangan bilang-bilang eee, kam panggil saja Tanto. Kalo ada yang kastau nanti sa tra bagi tomi-tomi lagi"

Tong langsung rame-rame bilang oooooo, Tanta Togel, baru tong terawa sampe poro sakit eeeee

@Pinggir Kali Mati, 050512

https://www.facebook.com/groups/kosapa/