 |
| Ilustrasi. Foto; Wens Tabai |
Oleh; Ibiroma Wamla
Su 16 tahun anjing kaskado ini de hidup sebagai penjaga di rumah tuannya. Rumah deng kintal yang luas, ujung pukul ujung pohon-pohon matoa tumbuh sarat, biar trada musim juga de pu pesona bikin orang-orang dong selalu mo datang ke tampa ini.
Anjing kaskado, hidup menderita urus diri, garuk kanan, garuk kiri. Biar de kaskado tapi, de pu jahat, jang tanya! Kalo de su gongong, dong yang mo datang karao langsung tancap gas plat. Yooo, kam kore dia suda, kalo berani.
Tuan rumah pu teman-teman yang bos-bos itu datang, dong hanya janji-janji saja mo kasi obat. Ada lagi yang bilang nanti dong bikin kandang, tapi sampe hari ini, janji itu menguap tiba di laut. Yooo, memang mungkin dong su biasa makan daun gedi jadi.
Satu malam, anjing kaskado de jalan miring-miring masuk ke dalam rumah, busa keluar dari de pu mulut, "eeh kam coba cek de kenapa tu!" Paitua de perintah dong yang lagi asik duduk nonton tv.
Anana dong bubar dari depan tv, cek pu cek, ternyata ada yang berusaha potas anjing dia. Adoooo, orang-orang ni dong gila! Masa anjing kaskado begini dong potas. Pertolongan pertama pun dilakukan, dong bikin teh gula hangat baru kasi minum anjing. "Ko pigi beli susu, ini wang" paitua de kasi wang ke de pu anak yang ada berdiri di samping anjing.
Selesai minum teh, baru dobol deng susu, anjing pun selamat. Tapi Paitua pu satu anak de protes "Bapa, kastinggal de masti suda, kaskado begitu mo, nanti tong cari gantinya"
"Tra bisa anak, biar de kaskado, de su jaga tong pu tampa ini lama skali, dari ko masi kecil de su ada di sini. Bapa piara dia dari kecil eeee" Paitua de kasi tau de pu anak.
"Tapi Bapa, "
Bblom selesai anak de bicara, Paitua de su potong, "Begini anak kalo de ada, tong pu kintal ini aman, dong yang mo datang karao takut stenga mati. Swanggi yang mo datang juga anjing de tau, de cium dong pu bau. Jadi tong harus jaga dia, ko tau to su tiga kali dong potas anjing ini tapi tra mati."
"Iyo Bapa, nanti sa jaga dia! Nanti sa pigi tanya obat kaskado baru sa kasi anjing ni supaya de sembuh eeee."
"Anak itu yang betul, bapa kasi ko dua jempol"
"SELAMAT ULANG TAHUN WACH DOG"
@Pinggir_Kalimati 050514
Anjing kaskado, hidup menderita urus diri, garuk kanan, garuk kiri. Biar de kaskado tapi, de pu jahat, jang tanya! Kalo de su gongong, dong yang mo datang karao langsung tancap gas plat. Yooo, kam kore dia suda, kalo berani.
Tuan rumah pu teman-teman yang bos-bos itu datang, dong hanya janji-janji saja mo kasi obat. Ada lagi yang bilang nanti dong bikin kandang, tapi sampe hari ini, janji itu menguap tiba di laut. Yooo, memang mungkin dong su biasa makan daun gedi jadi.
Satu malam, anjing kaskado de jalan miring-miring masuk ke dalam rumah, busa keluar dari de pu mulut, "eeh kam coba cek de kenapa tu!" Paitua de perintah dong yang lagi asik duduk nonton tv.
Anana dong bubar dari depan tv, cek pu cek, ternyata ada yang berusaha potas anjing dia. Adoooo, orang-orang ni dong gila! Masa anjing kaskado begini dong potas. Pertolongan pertama pun dilakukan, dong bikin teh gula hangat baru kasi minum anjing. "Ko pigi beli susu, ini wang" paitua de kasi wang ke de pu anak yang ada berdiri di samping anjing.
Selesai minum teh, baru dobol deng susu, anjing pun selamat. Tapi Paitua pu satu anak de protes "Bapa, kastinggal de masti suda, kaskado begitu mo, nanti tong cari gantinya"
"Tra bisa anak, biar de kaskado, de su jaga tong pu tampa ini lama skali, dari ko masi kecil de su ada di sini. Bapa piara dia dari kecil eeee" Paitua de kasi tau de pu anak.
"Tapi Bapa, "
Bblom selesai anak de bicara, Paitua de su potong, "Begini anak kalo de ada, tong pu kintal ini aman, dong yang mo datang karao takut stenga mati. Swanggi yang mo datang juga anjing de tau, de cium dong pu bau. Jadi tong harus jaga dia, ko tau to su tiga kali dong potas anjing ini tapi tra mati."
"Iyo Bapa, nanti sa jaga dia! Nanti sa pigi tanya obat kaskado baru sa kasi anjing ni supaya de sembuh eeee."
"Anak itu yang betul, bapa kasi ko dua jempol"
"SELAMAT ULANG TAHUN WACH DOG"
@Pinggir_Kalimati 050514
