Susi, Perem Tanah (Bagian I)

Nona Papua - IST

Oleh: Marcell Rio Monireng

Rambut tra boding. Tra mekap. Tapi ko cantik skali. Ko ini sudah bidadari yang tete manis kirim dari Surga. Sio, Cendrawasih e ko bikin sa pu hati babunga skali. Ko bilang su, sa su tratau mo bilang apa deng perasaan ini. Sa tra tipu. Sa jatuh cinta sama ko ya perem tanah.

Sa tra tau. Mungkin karna sa mo ketemu ko ka, jadi sa macam ingin skali ke Abe trus. Tapi sa tau. Bukan karna mo ketemu ko saja. Tapi hari itu ana-ana dong bikin pentas tarian di depan kampus Uncen Abe situ. Pas di depan museum Uncen. Dan sa ni suka ana-ana muda yang masih mau pake dong pu pakean adat, trus pentas tarian dan seni dar dong pu daerah. Sa paling smangat lagi kalo dong pake bahasa daerah sendiri. Jadi sa juga datang ke tempat ana-ana pentas tarian.

Iyo, hari itu sa su mo kembali ke Sentani, tapi trajadi karna sa dengar dong bilang ada pentas tu. Jadi sa batalkan. Supaya pigi setelah tonton pentas tu.

Begini, ale.... yang datang tonton itu orang banyak skali. Sa duduk pas dekat auditorium sambil makan-makan pinang yang sa beli di mama satu yang jualan dekat USJT. Dan pas su sore menjelang malam itu, sa lihat banyak ana-ana yang datang pake dong pu pakean adat masing-masing. Sa kas keluar kamera dari tas, trus sa poto-poto dorang. Pokoknya dong andalan sudah.

Begini, pembawa acara dong datang. Tapi karna ketua panitia blom datang jadi dong isi deng cerita-cerita mob. Pembawa acara pu gaul apa,pele... dong semua pake baju adat lagi ni. Yang perem sa lihat de pake cawat. Orang Mee biang, Moge. Orang di Wamena dong bilang Sali. Orang Migani dong bilang Sabo. Pokoknya de cantik sudah. Ini perem tanah mo. Mo lawan ka. Trus yang laki-laki juga tra mau kalah. Jadi de juga hias de pu badan sampe bagus skali. Pokoknya juara sudah.

Kegiatan sudah mulai. Pembawa acara de mulai sapa penonton. Sa dorang buka dengan doa. Habis doa dorang kasi sambumtan-sambutan singkat. Inti dari sambutan yang sa dengar tuh begini, kegiatan-kegiata seperti ini penting. Karna ana-ana sekarang dong su mulai kastinggal dan mulai malas tau deng dong pu budaya. Apalagi bahasa daerah. Jadi penting sekali.

Adoo.... perem-perem tanah dong andalan skali. Dong cantik skali. Apalagi dong tra bonding dong pu rambut. Pele..... Cendraswasih betul. Indah dan cantik.

Dong mulai pentas. Pembawa acara panggil satu-satu. Mulai dari Sorong sampai Skouw. Trus dari Pulau Biak sampe pulai Adi. Sa tonton sambil mengahayti setiap tarian dari daerah-daearah di Papua itu deng cermat. Memang andalan skali. Dong pu penampilan-penampilan keren-keren. Jadinya sa tahu tarian-tarian dari Papua tuh.

***

Sa tanya ana-ana dong. Memang ko pu penampilan tuh bikin sa pu hati tausik. Jadi sa tanya begini, dong bilang ko pu nama Susi. Ah, Susi yang andalan ka. Sa mo bilan, Susi ko pu penampilan tuh bikin sa pu hati gementar-gementar ni. Tratau kenapa. Tapi yang jelas tuh sa trabisa tipu sa pu hati. Sa lihat ko ni, sumpah. Hati gemnetar skali. Sa mo kastau langsung ke ko. Tapi sa tra kenal ko ni. Trus, sa ragu brat. Kalo sa bilang, nanti ko trima untuk bicara deng orang seperti sa ka tra.

“Sio ah...

Susi,.... ko bikin sa pu hati susah skali”

Sudahlah. Sa simpan sa pu perasaan itu dalam-dalam. Lebih baik sa pulan ke Sentani. Supaya sa kasi hilang ko pu bayang-bayang yang terukir bagus dalam sa pu hati ni.

Sa pulang ke Sentani. Begini pas hari Sabtu itu sa pu pikiran ni lari ke Lingkaran trus. Jadi sa laju dari Sentani ke Abe pake sa pu motor trabaik yang biasa temani sa ke mana-mana. Karna sore, cuacca juga bagus, jadi sa mampir dulu di Kalkote. Sambil sa makan-makan pinang yang sa beli di Enggo dong di Netar.

Sa menghayal yang trajadi punya. Sa bayangkan, kalo ko bisa duduk dekat sa di pinggir danau ini, sa akan bilang, Tuhan de luar biasa. De kasi sa hadiah yang trada duanya. Sa akan bilang, trimakasih Tuhan. Ko su kasi sa hadiah ini. sa akan jaga dia. Sampai kapan pun. Tapi su tau to ini hanya khayalan. Kalo orang menghayal tuh, barang yang trabisa terwujud juga macam barang de mudah skali. Jadi semua yang ada di pikiran yang bagus-bagus saja.

Su sore skali jadi sa lanjut ke Abe. Jujur, sa tratau sa mo buat ada di Abe. Trada tujuan. Hanya karena sa pu hati ingin sa ke sana saja. Mungkin karna malam minggu jadi mo hitung-hitung mace-mace tanah yang lewat-lewat di Lingkaran. Hahaha...

Sa sampe di Abe. Tapi sa parkir sa pu motor di depan gereja Katolik Abe, trus sa jalan kaki ke arah Saga. Tapi sa ke dong bilang Toko Citra ka itu dulu. Sa beli gelang satu dan pet satu di sana. Pas sa lagi pilih-pilih topi begini, sa lihat depan sa nih macam Susi. Sa usap mata lagi baru sa lihat. Begini trada. Ah kimai ni, ini gara-gara sa melamun de trus ka apa. Tapi sungguh, sa pikir itu benaran dia sudah. Eh tau-tau begini salah.

Habi sa beli topi dan gelang tu sa jalan ke arah-arah Saga. Pas jalan, sampai dekat Saga, sa singgah di ATM bank Mandiri yang ada pas di pinggir kali tu. Baru sa jalan pelan-pelan ke Saga. Begini pas dari dekat parkiran ada yang batariak, Susi..... Jadi sa yang baik muka dan sa cari orang yang de panggil itu ada di mana. Sa lihat begini trada. Cuman ada perema tanah dua yang baru parkir motor baru ada jalan masuk ke Saga. Mungkin karna sa mabuk. Mabuk karna ko pu bayang-bayang tuh bikin sa trafokus. Jadi sa jalan terus ke sana. Tujuannya sa mo makan di Solaria.

Pas jalan begini, booo ko tau to, di Solaria ni, orang  amber saja yang penuh. Sa cuman pesan jus Alfokad. Minuman yang sa ping suka. Baru sa duduk manis di ujung. Sambil lirik ke sana ke mari. Sa beraharap skali ketemu orang yang sa kenal. Setidaknya supaya sa bisa cerita-cerita deng dorang.

Pas sa ada minum jus Alfokad sambil main HaPe ni, macam ada yang ketawa bokar di luar. Pas naik eskalator. Sa buang mata keluar baru sa perhatikan baik-baik. Begini, ada perem tanah dua ada naik. Yang satu nih macam sa kenal tapi yang satu ni sama skali sa tra kenal.

Sa pu mata nih terus lihat ke perem satu tuh. De pu rambut de tra ikat. Rambut asli too, pele. Bikin sa naksir skali. Baru, su tau to biar dong tra mekap maca-macam juga perem-perem tanah tuh paling andalan sudah.

“Kalo pun tra mekap, dorang tuh cantik skali.

Sama kaya burung surga yang ada di surga kecil yang jatuh ke bumi ni”

Dong dua juga pesan makanan baru dong dua duduk tra jauh dari sa pu tempat duduk. Sa duduk manis saja. Sa suka perem tanah yang berpenampilan biasa saja. Sa paling tra suka lihat perem tanah yang cantik tapi de pu rambut de bonding, baru pake mekap yang kelas over dosis punya. Begini, pas dong dua ada jalan datang, sa lihat baik-baik ni.

Dan...... itu sudah. Sa tra salah skali. Orang yang terus jadi bayang-bayang di sa pu pikiran itu skarang ada depan mata. Ai mama..... sa pu hati rasa bagimana e. Belum kenal juga. Sa mo sapa tapi, nanti dong bilang sa gila ato cari perhatian lagi.

Tapi, ko tau ka tra, sungguh dalam hati ini rasa geli-geli skali. Pas lihat Susi tuh. Sa cuman bilang dalam sa pu hati, “Susi,laki-laki tanah yang ada dekat kam dua ni, de ada salah tingkah lihat ko ni,”. Sudahlah, sa pura-pura tra rasa apa-apa. Sa main HaPe sambil minum jus itu. Tapi sa mata ni, lari terus ke Susi. ‘Adoo.... Susi, ko ada rasa apa yang sa pu hati ada rasa ka?’ Sa bikin sa pu status di twitter begitu.

Malam minggu tuh, sa ketemu dia di Solaria Saga. Sa pu hati susah skali. Sa mo bilang ka tra, sa bingung. Habis jang sampe orang pu pacar baru tong ganggu kan tra baik. Jadi sa kastinggal saja. Tapi, dalam sa pu hati ni, rasa maam ada yang mendidih. Trabisa tahan.

Sa ni orangnya pamalu. Jadi trasuka untuk sa bilang langsung. Pokoknya, hampir tiga jam tuh, sahabiskan di Solaria situ. Su ketemu orang yang bikin sa pu hati susah, jadi mau tra mau sa harus tunggu di situ sampe dong jalan.

Su tiga jam lebih di Solaria, dorang dua ada turun. Jadi sa juga tunggu sebentar baru, sa jalan dari belakang. Ikut dong dua ke bawa. Sampai di bawa, dong dua lurus ke arah motor yang dong dua parkir. Jadi sa jaan sampai di pintu. Pokoknya sa tunggu sampe dong dua pergi, begini, dong dua motor. De pu teman yang gonceng dia.

Susi de pu ram but panjang, tra ikat, itu terlihat jelas pas jalan. Dan akhirnya mereka belok dan hilang di balik tembok gedung hotel Grand Abe Hotel.

Sa juga jalan kaki ke depan gerejakatolik Abe, karna sa pu motor sa ada parkir di sana. Pas sa jalan tuh sa smangat skali. Walo pun tra bikin apa-apa, tai setidaknya sa bisa lihat perem tanah yang bikin sa pu hati susah tu. Mungkin itu jawaban dari tadi yang bikin sa ingin ke Abe terus. Sepanjang jalan, sa ingat apa yang sa rasa pas duduk berdekatan di Solaria, baru sa senyum-senyum sendiri. Hati babunga skali. Setelah itu sa pulang.

***

Besok paginya sa dapat esemes dari sa pu teman yang kuliah di Uncen. De bilang, hari Jumat depan nanti ana-ana MIPA dong ada bikin kegiatan. Baru karna sa su bilang kalo sa ada naksir Susi tu. Jadi de bilang, kegiatan itu nanti Susi dong lagi yang bikin. Jadi ko datang. Itu sa tambah semangat. Sa bilang nanti hari Kamis sa ke Padang Bulan untuk tidur di de pu kos baru jalan sama-sama ke Uncen.

Dan sa bilang, kalau nanti pas ketemu, kasi kenal sa ke Susi. Tapi de juga bilang de tra kenal dekat. Jadi tramau. Jadi sa bilang oke sudah trapapa. Nanti sa bilang ke dia sendiri. Yang penting hari Jumat sa jadi anak MIPA Uncen. Untuk hari Jumat saja.

Terus, hari Kamis sa ke Pandang Bulan. Tidur di sa pu teman pu kos. Sepanjang malam sa tra tidur. Sa pikir, strategi apa yang sa mo pake. Sa putuskan, nanti sa minta de pu nomor saja. Habis itu baru pikir yang lain untuk mau ke depan atau tetap di posisi semula.

Pas hari Jumat, tong dua ke MIPA. Pu smangat apa. Tong dua duluan tiba. Kegiatan belum mulai. Baru sa bukan anak MIPA Lagi. Hahha.... aneh. Tunggu-tunggu sebentar begini, dekan MIPA datang. Tralama lagi dan kegiatan dimulai. Dong pameran. Sa datang ke stand-stand yang dong bikin. Ada sekitar delapan stand. Trus, sa jalan keliling-keliling setiap stand. Dan betul, sa lihat dia pas de ada jaga stand Kimia.

Dalam hati sa bilang. Ini sa pu kesempatan. Sa bikin diri sa pintar di Kimia. Baru sa tanya banyak ke Susi. De juga jelaskan semua yang sa tanya dengan baik skali. De pintar skali. Setiap pertanyaan, de jawab sesuai. Sa jadi tambah smangat. Tapi dalam sa pu hati ni, gei-geli setiap kali lihat de pu muka.

Habis itu sa pergi ke stand yang lain lagi. Trus, stelah itu di dalam panas jadi sa keluar untuk ambil angin. Sa berteduh di bawah pohon ketapang yang ada di depan lab, sambil makan pinang. Begini, Susi de keluar lagi. Tapi de pake motor baru pergi. Entah ke mana. Sa makan pinang di situ. Sambil tunggu deng harapan, Susi datang cepat. Supaya sebelum de masuk, biar sa cegat dia baru minta nomor HaPe.

Begini, de datang. Di tenteng air minum. Nampaknya de habis beli air.  Pas de jalan masuk ke dalam, sa pigi ke dia dan sa minta nomor. De bilang, untuk apa, baru sa bilang, trada sa cuman minta saja. Dan akhirnya de kasi. Tapi sa bilang, sabar sa miskol dulu. Karna kadang-kadang perem-perem tanah dong kasi nomor yang salah. Jadi sa miskol untuk pastikan. Dan betul itu de pu nomor. Jadi sa bilang, sa su miskol. Dan dia pun pergi ke dalam.

Sa deng sa pu teman juga pulang. Sa bilang ke dia, yang penting sa su minta de pu nomor, dan de su kasi. Jadi skarang kitong pulang. Tapi sa pulang ke Sentani. Trus de pulang ke Padang Bulan.

Sa sampe di putaran Taksi Perumnas III, baru sa esemes ke Susi.

Sa: Mat siag, ini sa pu nomor

Susi: ini deng sapa?

Sa: Ini deng laki-laki yang ada minta ko pu nomor di depan kampus tuh.

Susi: O iyo, maaf kaka. Kk pu nama sapa?

Sa: sa nama Marsel.

Susi: o iyo kk, sa su simpan.

Sa: terimakasih. Kalo begitu lanjut deng kegiatan sudah.

Susi: iyo terimkasih kaka.

Setelah itu sa pulang ke Sentani. Pas sampai di rumah begini, ada esemes masuk. Jadi sa buka baru lihat begini, sms dari dia. Sa buka, begini de esemes begini, ‘Mat siang all, jang lupa makan’. Cuman begitu saja. Sa tra balas. Karena itu de kirim bukan untuk sa saja. Pas sore-sore begini, sa esemes, ‘Mat sore dan mat beraktifitas org2 tersayang’. Dan de balas, ‘makasih kk’.

Pas besoknya, sa bilang nanti sa ke Abe. Tapi untuk ketemu dia. sa mo ketemu dia....

Bersambung....!